என்னடா வாழ்க்கை?

 என்னடா வாழ்க்கை?

--------------------------------------------------

நானெடுத்த பிறவி இதுதானா?

நாளெலாம் துன்பம் துணைதானா?

தாயே! இதுதான் சரிதானா?

தமிழே! இதுஉன் வரம்தானா?

காட்டுக்குள் அலைவதுபோல் அலைகின்றேன்--நான்

கூட்டத்தில் தொலைந்ததுபோல் அழுகின்றேன்!

வேட்டைக்குப் பலியாடாய் நிற்கின்றேன்!--வறுமைச் 

சாட்டைக்கு விருந்தாகித் துடிக்கின்றேன்!

பாலைக்குள் பயணத்தைத் தொடர்கின்றேன்---சோர்ந்தே

ஆலையில் சக்கையென விழுகின்றேன்!

சோலையும் என்னை வெறுக்கிறதே---தேன்

மாலையும் எனக்குக்  கசக்கிறதே!

வாழ்வினில் நிம்மதி தேய்கிறது---என்

வாசலில் விரக்தி பாய்கிறது!

ஊழ்வினை என்பது இதுதானா?--இந்தத்

தாழ்வுகள் எல்லாம் நிலைதானா?

மதுரை பாபாராஜ்

நூல்:மகிழம்பூ

ஆண்டு:1997

--