மனித நேயத்துடன் மீள்குடியேற்றம் செய்யுங்கள்

=====================================================
ஈழத் தமிழரைப் பாருங்கள்!
இன்னல் வேதனை பாருங்கள்!
உண்ணச் சரியாய் உணவில்லை!
உடுக்க போதிய உடையில்லை!

சொந்த நாட்டில் அகதிகளாய்
சோகச் சித்திர மாகத்தான்
நொந்து நைந்த விரக்தியுடன்
நொறுங்கிப் போனார் நடைப்பிணமாய்!

உறவைப் பிரிந்தே தவிக்கின்றார்!
உறவைத் தேடி அலைகின்றார்!
உறவைக் காண வில்லையடா!
உலகம் இருளாய்த் தோன்றுதடா!

தமிழின மக்களைக் கடத்துகின்றார்!
தமிழ்க்குலக் கற்பை அழிக்கின்றார்!
அமைதி, நிம்மதி கானலடா!
அனுதினம் வாழ்க்கை அவலமடா!

செய்தித் தாளைப் படித்தாலே
திகைப்பும் கவலையும் பெருகுதடா!
கைகள் எட்டும் தூரந்தான்!
கண்ணீர் விழிகளின் ஓரந்தான்!

குருவிகள் கூட மரங்களிலே
கூடுகள் கட்ட உரிமையுண்டு!
அருமைத் தமிழர் வாழ்வதற்கு
அவர்தம் நாட்டில் உரிமையில்லை!


மிச்சம் சொச்சம் இருப்போரை
மீள்குடி யேற்றம் செய்யுங்கள்!
அக்கறை யோடு செயல்பட்டு
அவர்களை வாழ வைத்திடுங்கள்!

--- மதுரை பாபாராஜ்