முதலும் திரவம்! முடிவும் திரவம்!

திரவத்தால் சேர்ந்து திடப்பொரு ளாகி
திரவத்தில் தேங்கித் திடமாக வந்தே
உலகில் திடமாய் நடந்து திரிந்து
உழன்றே உருகி பலநிலை கண்டே
சுழன்று விழுவோம் திடநிலை சாய!
திரவ அழுகை திடத்தை நனைக்க
அரற்றிப் புலம்பி திரவக் குடங்கள்
திரவத்தை ஊற்றிக் கதறும் உறவுகள்
திரவ உருவாய் மனைவி குழந்தை
திரவம் விழியில் பெருகிப் பெருகி
கிளம்பும் திடமோ உணர்ச்சியே இன்றி
உலகைத் துறந்து உறவை மறந்து
அவலச் சுவையின் சிகரம்! தகனம்!
கரையும் கரையும் திடநிலை எல்லாம்
கரைப்பார் இறுதியாய்ச் சாம்பல் பொடியை!
திரவக் கடலில் கலப்போம்! தொடக்கம்
திரவம்! முடிவும் திரவமாக வாழ்க்கைப்
பயணம் முடியும் உணர்.