15.பிறனில்விழையாமை

 குறள்களுக்குக் குறள்வடிவில. கருத்து!

15.பிறனில்விழையாமை

குறள் 141:

பிறன்பொருளான் பெட்டொழுகும் பேதைமை ஞாலத்

தறம்பொருள் கண்டார்க ணில்லென்றார் அய்யன்!

பிறன்மனை நாடும்  கயமை,

அறநூல் 

அறிந்தோர் விழையமாட்டார் சொல்.

குறள் 142:

அறன்கடை நின்றாரு ளெல்லாம் பிறன்கடை

நின்றாரிற் பேதையா ரில்லென்றார் அய்யன்!

பிறன்மனை நாடுகின்ற குற்றத்தைச் செய்வோர்

அறம்பிறழ்ந்த கீழோர்க்கும் கீழ்.

குறள் 143:

விளிந்தாரின் வேறல்லர் மன்ற தெளிந்தாரில்

தீமை புரிந்தொழுகு வாரென்றார் அய்யன்!

புறத்திலே நட்பும் உளத்தில் துரோகம்

உடையோர் நடைப்பிணந் தான்.

குறள் 144:

எனைத்துணைய ராயினும் என்னாந் தினைத்துணையும்

தேரான் பிறனில் புகலென்றார் அய்யன்!

பிழையென் றறிந்தும் பிறன்மனை நாடல்

குணக்குன் றெனினும் பிணம்.

குறள் 145:

எளிதென இல்லிறப்பா னெய்துமெஞ் ஞான்றும்

விளியாது நிற்கும் பழியென்றார் அய்யன்!

எளிதாய்ப் பிறர்மனையைத் தீண்டலாம் என்னும்

கழிசடையைத் தீண்டும் பழி.

குறள் 146:

பகைபாவம் அச்சம் பழியென நான்கும்

இகவாவாம் இல்லிறப்பான் கண்ணென்றார் அய்யன்.

பகைதீமை அச்சம் பழியென்றும் நீங்கா

பிறன்மனை நாடுவோனை விட்டு.

குறள் 147:

அறனியலான் இல்வாழ்வா னென்பான் பிறனியலான்

பெண்மை நயவா தவனென்றார் அய்யன்!

பிறன்மனை நாடாத பண்பாளன் மட்டும்

அறங்காக்கும் இல்லறத்தா னாம்.

குறள் 148:

பிறன்மனை நோக்காத பேராண்மை சான்றோர்க்

கறனென்றோ ஆன்ற வொழுக்கென்றார் அய்யன்!

பிறன்மனையை நாடாத  சான்றாண்மை ஒன்றே

அறமும் ஒழுக்கமு மாம்.

குறள் 149:

நலக்குரியார் யாரெனின் நாமநீர் வைப்பின்

பிறற்குரியாள் தோள்தோயா தாரென்றார் அய்யன்!

கடல்சூழ் உலகத்தின் நன்மைகள் எல்லாம்

பிறர்மனைத் தோள்சேரா தார்க்கு.

குறள் 150:

அறன்வரையா னல்ல செயினும் பிறன்வரையாள்

பெண்மை நயவாமை நன்றென்றார் அய்யன்!

பிறன்மனை நாடும் செயலோ அறத்தின்

நெறிமறத்தல் வாழ்வினும் தீது.