ஆற்றலை நம்பு

 

ஆற்றல் உண்டு!

எல்லாம் நம்மால் முடியும்

முயற்சி உழைப்பால் விடியும்

வாய்ப்புகள் வந்தே தூண்டும்

வருவதை ஏற்பது வேண்டும்

உன்னிடம் ஆற்றல் உண்டு

அஞ்சாமல் அதனைக் காட்டு

நேர்மை நியாயம் மூச்சு

உண்மை தெளிவே பேச்சு

குறளின் அறத்தைப் போற்று

பொய்மை பொறாமை தூற்று

ஒழுக்க மான வாழ்க்கை

சான்றோ னாக்கிக் காட்டும்

ஈகை இசைபட வாழ்தல்

ஈடிலா வாழ்க்கை உலகில்

இன்னா செய்தா ருக்கும்

நன்னயம் செய்தல் வேண்டும்

வாய்ச்சொல் வீரர் கோழை

சொல்வதைச் செய்வோர் வீரர்

இன்சொல் பேசி நிமிர்வோம்

வன்சொல் பேச அஞ்சுவோம்

இலக்கை நோக்கி ஏறு

தடைகளைத் தாண்டி ஏறு

துன்பம் கலக்கம் நீக்கு

இன்பமாய் அதனை மாற்று

உனது கையில் வாழ்வு

உனக்கோ இல்லை தாழ்வு

நம்பிக்கை யோடு வாழ்வோம்

வசப்படும் நமக்கு வானம்

மதுரை பாபாராஜ்