14. ஒழுக்கம் உடைமை

 குறள்களுக்குக் குறள்வடிவில் கருத்து

14. ஒழுக்கம் உடைமை

குறள் 131:

ஒழுக்கம் விழுப்பந் தரலான் ஒழுக்கம்

உயிரினும் ஓம்பப் படுமென்றார் அய்யன்.

ஒழுக்கமே வாழ்வில் உயர்வை வழங்கும்!

ஒழுக்கம் உயிரினும் மேல்.

குறள் 132:

பரிந்தோம்பிக் காக்க ஒழுக்கந் தெரிந்தோம்பித்

தேரினும் அஃதே துணையென்றார் அய்யன்!

ஒழுக்கமே வாழ்வின் துணையாம்! அதனைப்

பழுதின்றிக் காத்தால் உயர்வு.

குறள் 133:

ஒழுக்க முடைமை குடிமை இழுக்கம்

இழிந்த பிறப்பாய் விடுமுன்னால் அய்யன்!

ஒழுக்கம் உயர்ந்த பிறப்பை உணர்த்தும்!

இழிவே ஒழுக்கமற்ற பண்பு.

குறள் 134:

மறப்பினும் ஓத்துக் கொளலாகும் பார்ப்பான்

பிறப்பொழுக்கங் குன்றக் கெடுமென்றார் அய்யன்!

மறையை மறந்துவிட்டால் கற்கலாம் மீண்டும்!

ஒழுக்கம் குறைந்தால் இழிவு.

குறள் 135:

அழுக்கா றுடையான்கண் ஆக்கம்போன் றில்லை

ஒழுக்க மிலான்கண் உயர்வென்றார் அய்யன்!

பொறாமைக் குணமிருந்தால் செல்வமில்லை! ஒழுக்கப்

பிறழ்விருந்தால் இல்லை உயர்வு.

குறள் 136:

ஒழுக்கத்தி னொல்கார் உரவோர் இழுக்கத்தின்

ஏதம் படுபாக் கறிந்தென்றார் அய்யன்!

ஒழுக்கம் பிறழ்ந்தால் இழிவென் றறிந்தோர்

ஒழுக்கம் தவறமாட்டார் சொல்.

குறள் 137:

ஒழுக்கத்தி னெய்துவர் மேன்மை இழுக்கத்தின்

எய்துவ ரெய்தாப் பழியென்றர் அய்யன்!

ஒழுக்கம் தலைநிமிர வைக்கும்! பிறழ்ந்தால்

பழியும் தலைகுனிவும் தான்.

குறள் 138:

நன்றிக்கு வித்தாகும் நல்லொழுக்கந் தீயொழுக்கம்

என்றும் இடும்பை தருமென்றார் வள்ளுவர்!

நல்லொழுக்கம் நன்மை தருவது! தீயொழுக்கம்

அல்லலுக்கு வித்தூன்றும் சொல்.

குறள் 139:

ஒழுக்க முடையவர்க் கொல்லாவே தீய

வழுக்கியும் வாயாற் சொல்லென்றார் அய்யன்!

தவறியும் தீயசொல் சொல்லார் ஒழுக்க

நெறிகொண்டு வாழ்வோர் தான்.

குறள் 140:

உலகத்தோ டொட்ட ஒழுகல் பலகற்றுங்

கல்லா ரறிவிலா தாரென்றார் அய்யன்!

உயர்ந்தோர் ஒழுக்கத்தை ஏற்க மறுப்போர்

பலகற்றும் கல்லார் உணர்.