11 செய்ந்நன்றியறிதல்

 குறளுக்குக் குறள்வடிவில் கருத்து

11. செய்ந்நன்றியறிதல்

குறள் 101:

செய்யாமல் செய்த உதவிக்கு வையகமும்

வானகமும் ஆற்றல் அரிதென்றார் வள்ளுவர்!

நன்மையே செய்யாத மாந்தருக்குச் செய்கின்ற

நன்மைக்கு ஈடோ உலகு?

குறள் 102:

காலத்தி னாற்செய்த நன்றி சிறிதெனினும்

ஞாலத்தின் மாணப் பெரிதென்றார் வள்ளுவர்!

தேவைக் குரியநேரம் செய்கின்ற சிற்றுதவி

ஞாலத்தை விஞ்சும் அளவு

குறள் 103:

பயன்தூக்கார் செய்த உதவி நயன்தூக்கின்

நன்மை கடலின் பெரிதென்றார் அய்யன்!

பயனெதிர் பார்க்காமல் செய்த உதவி

கடலினும் என்றும் பெரிது.

குறள் 104:

தினைத்துணை நன்றி செயினும் பனைத்துணையாக்

கொள்வர் பயன்தெரி வாரென்றார் அய்யன்!

தினையளவே நன்மை எனினும் பயனால்

பனையள வென்பார் மகிழ்ந்து.

குறள் 105:

உதவி வரைத்தன் றுதவி உதவி

செயப்பட்டார் சால்பின் வரைத்தென்றார்

அய்யன்!

உதவி அளவைப் பொறுத்தல்ல  ஆனால்

உதவிபெற்றோர் பண்பைப் பொறுத்து.

குறள் 106:

மறவற்க மாசற்றார் கேண்மை துறவற்க

துன்பத்துள் துப்பாயார் நட்பென்றார் அய்யன்.

துறக்காதே துன்பம் துடைத்தோரின் நட்பு!

மறக்காதே தூயோர் உறவு.

குறள் 107:

எழுமை எழுபிறப்பும் உள்ளுவர் தங்கண்

விழுமந் துடைத்தவர் நட்பென்றார் அய்யன்!

எழுபிறவி ஆனாலும் துயர்துடைத்தோர் நட்பைப்

பொழுதெல்லாம் எண்ணவேண்டும் சொல்.

குறள் 108:

நன்றி மறப்பது நன்றன்று நன்றல்லது

அன்றே மறப்பது நன்றென்றார் வள்ளுவர்!

நன்மையை என்றும் மறக்காதே! தீமையை

அன்றே மறப்பது நன்று.

குறள் 109:

கொன்றன்ன இன்னா செயினும் அவர்செய்த

ஒன்றுநன் றுள்ளக் கெடுமென்றார் வள்ளுவர்!

துன்பத்தைச் செய்தாலும் அன்பரோ

முன்செய்த 

நன்மையை எண்ணி மற.

குறள் 110:

எந்நன்றி கொன்றார்க்கும் உய்வுண்டாம் உய்வில்லை

செய்ந்நன்றி கொன்ற மகற்கென்றார் வள்ளுவர்!

இங்கே அறத்தை மறந்தாலும் வாழ்வுண்டு

நன்

றி  மறந்தாலோ தாழ்வு.