57 வெருவந்த செய்யாமை

 குறள்களுக்குக் குறள்வடிவில் கருத்து

57 வெருவந்த செய்யாமை

(அஞ்சத்தக்கன செய்யாதிருத்தல்)

குறள் 561:

தக்காங்கு நாடித் தலைச்செல்லா வண்ணத்தால்

ஒத்தாங் கொறுப்பது வேந்து.

குற்றத்தை ஆய்ந்தறிந்து தண்டித்தே மீண்டுமக்

குற்றம் தடுத்தல் அரசு.

குறள் 562:

கடிதோச்சி மெல்ல வெறிக நெடிதாக்கம்

நீங்காமை வேண்டு பவர்.

வேகத்தைக் காட்டி வரம்பினை மீறாமல் நாடறிய மென்மையாய்த்  தண்டனை

தந்திருந்தால்

நீடுவாழும் அந்த அரசு.

குறள் 563:

வெருவந்த செய்தொழுகும் வெங்கோல னாயின்

ஒருவந்தம் ஒல்லைக் கெடும்.

குடிமக்கள் அஞ்சும் கொடுங்கோலர் ஆட்சி

நெறிகெட் டழியும் இடிந்து.

குறள் 564:

இறைகடியன் என்றுரைக்கும் இன்னாச்சொல் வேந்தன்

உறைகடுகி ஒல்லைக் கெடும்.

மக்கள் வெறுக்கும் கொடுங்கோலர்

ஆட்சியோ

எக்கணமும் வீழும் அழிந்து.

குறள் 565:

அருஞ்செவ்வி இன்னா முகத்தான் பெருஞ்செல்வம்

பேஎய்கண் டன்ன துடைத்து.

காண வருவோரைப் பார்க்கத் தவிர்ப்பவன்

காண்போர் வெறுக்க கடுகடுக்கப் பேசுவோன்

பேணுகின்ற செல்வங்கள் வீண்.

குறள் 566:

கடுஞ்சொல்லன் கண்ணிலன் ஆயின் நெடுஞ்செல்வம்

நீடின்றி ஆங்கே கெடும்.

கடுஞ்சொல்லும் ஈரமற்ற உள்ளமுள்ள வேந்தன்

கொடுஞ்செல்வம் போகும் அழிந்து.

குறள் 567:

கடுமொழியுங் கையிகந்த தண்டமும் வேந்தன்

அடுமுரண் தேய்க்கும் அரம்.

முறையற்ற தண்டனை மற்றும் கடுஞ்சொல்

நெறிமறந்த தீய அரசின் வலுவை

அழிக்கும் அரமாகும் சொல்.

குறள் 568:

இனத்தாற்றி எண்ணாத வேந்தன் சினத்தாற்றிச்

சீறிற் சிறுகுந் திரு.

கலந்தேதான் பேசாமல் வேந்தன் கோப

வழிநடந்தால் என்றும் அழிவு.

குறள் 569:

செருவந்த போழ்திற் சிறைசெய்யா வேந்தன்

வெருவந்து வெய்து கெடும்.

தற்காத்துக் கொள்ளாத வேந்தனுக்குப் போர்வந்தால்

எப்படியும் வீழ்வான் துவண்டு.

குறள் 570:

கல்லார்ப் பிணிக்குங் கடுங்கோல் அதுவல்ல

தில்லை நிலக்குப் பொறை.

கொடுங்கோல் அரசிங்கே கல்லாரை நம்பும்!

அதுவேதான் நாட்டின் சுமை.

மதுரை பாபாராஜ்