55 செங்கோன்மை

 குறள்களுக்குக் குறள்வடிவில் கருத்து

55 செங்கோன்மை

குறள் 541:

ஓர்ந்துகண் ணோடா திறைபுரிந் தியார்மாட்டும்

தேர்ந்துசெய் வஃதே முறை.

குற்றத்தை ஆய்ந்து நடுநிலையைப் பின்பற்றி

நிற்பதே தீர்ப்பென்று சாற்று.

குறள் 542:

வானோக்கி வாழும் உலகெல்லாம் மன்னவன்

கோனோக்கி வாழுங் குடி.

உயிரினங்கள் வாழும்  மழைநோக்கி! மக்கள்

செழிப்புடன் வாழ்வதற்கு செங்கோல் அரசின்

வழிநோக்கி வாழ்ந்திருப்பார் பார்த்து.

குறள் 543:

அந்தணர் நூற்கும் அறத்திற்கும் ஆதியாய்

நின்றது மன்னவன் கோல்.

அறநூல்கள் மற்றும் அறச்செயல்க ளுக்குப்

பொறுப்புதான் செங்கோ லரசு.

குறள் 544:

குடிதழீஇக் கோலோச்சு மாநில மன்னன்

அடிதழீஇ நிற்கும் உலகு.

மக்களைக் காத்துவாழும் நல்லரசை வையகமே

சுற்றிநின்று வாழ்த்தும் உவந்து.

குறள் 545:

இயல்புளிக் கோலோச்சு மன்னவ னாட்ட

பெயலும் விளையுளுந் தொக்கு.

பருவமழை நல்விளைச்சல் இவ்விரண்டும் நீதி

வழுவாத ஆட்சி சிறப்பு.

குறள் 546:

வேலன்று வென்றி தருவது மன்னவன்

கோலதூஉங் கோடா தெனின்.

பகைவீழ்த்தும்  வேலல்ல வெற்றி! மக்கள்

அகம்வாழ்த்தும்  செங்கோல்தான் சொல்.

குறள் 547:

இறைகாக்கும் வையகம் எல்லாம் அவனை

முறைகாக்கும் முட்டாச் செயின்.

உலகை அரசுகாக்கும்! நீதிமுறை ஆட்சி

அரசைத்தான் காக்குமென்று செப்பு.

குறள் 548:

எண்பதத்தான் ஓரா முரறசெய்யா மன்னவன்

தண்பதத்தான் தானே கெடும்.

முறைதவறி ஆளும் அரசனோ தானே

நிலைமாறி வீழ்ந்திடுவான் தாழ்ந்து.

குறள் 549:

குடிபுறங் காத்தோம்பிக் குற்றங் கடிதல்

வடுவன்று வேந்தன் தொழில்.

மக்களைக் காப்பது குற்றத்தைத் தண்டித்தல்

அக்கறை ஆட்சிப் பொறுப்பு.

குறள் 550:

கொலையிற் கொடியாரை வேந்தொறுத்தல் பைங்கூழ்

களைகட் டதனொடு நேர்.

கொடியவரைத் தண்டித்தல்  நெல்வயலில் உள்ள

களைபறித்துக் காப்பதுபோ லாம்.

மதுரை பாபாராஜ்