53 சுற்றந்தழால்

 குறள்களுக்குக் குறள்வடிவில் கருத்து

53 சுற்றந்தழால்

குறள் 521:

பற்றற்ற கண்ணும் பழைமைபா ராட்டுதல்

சுற்றத்தார் கண்ணே உள.

ஒருவருக்கு ஏழ்மை நிலைவரினும் சுற்றம்

பழம்பெருமை பாராட்டும் சூழ்ந்து.

குறள் 522:

விருப்பறாச் சுற்றம் இயையின் அருப்பறா

ஆக்கம் பலவுந் தரும்.

நிரந்தர அன்பளிக்கும் சுற்றம் அமைந்தால்

பெருகும் பலவளங்கள் தான்.

குறள் 523:

அளவளா வில்லாதான் வாழ்க்கை குளவளாக்

கோடின்றி நீர்நிறைந் தற்று.

கரையின்றி  நீர்நிறைந்த  ஊர்க்குளம் போல

உறவுடன் வாழாதார் வாழ்வு.

குறள் 524:

சுற்றத்தாற் சுற்றப் படவொழுகல் செல்வந்தான்

பெற்றத்தாற் பெற்ற பயன்.

சுற்றத் துடன்வாழும் வாழ்க்கையே செல்வங்கள்

பெற்ற பயனாகும் செப்பு.

குறள் 525:

கொடுத்தலும் இன்சொல்லும் ஆற்றின் அடுக்கிய

சுற்றத்தாற் சுற்றப் படும்.

ஈதலும் இன்சொலும் பண்பாக உள்ளவரைச்

சூழவரும் சுற்றம் விழைந்து.

குறள் 526:

பெருங்கொடையான் பேணான் வெகுளி அவனின்

மருங்குடையார் மாநிலத் தில்.

கொடைப்பண்பும் கோபமும் இல்லான்போல் சுற்றம்

உடையோன் உலகிலில்லை சாற்று. 

குறள் 527:

காக்கை கரவா கரைந்துண்ணும் ஆக்கமும்

அன்னநீ ரார்க்கே உள.

காகம் அழைத்துண்ணும் சுற்றத்தை! அப்பண்பை

வாழ்வில் உடையோர்க்(கு)  உயர்வு.

குறள் 528:

பொதுநோக்கான் வேந்தன் வரிசையா நோக்கின்

அதுநோக்கி வாழ்வார் பலர்.

பொதுவாக நோக்காமல் ஆற்றலுக் கேற்ப

மதிக்கும் அரசனைச் சுற்றமாய்ச் சூழ்வார்!

மதிக்கவேண்டும் ஆற்றலைப் பார்த்து.

குறள் 529:

தமராகித் தற்றுறந்தார் சுற்றம் அமராமைக்

காரண மின்றி வரும்.

சுற்றம் பிரிந்தாலும் மீண்டும் உணர்ந்ததும்

பற்றுடன் வந்துசேர்வார் பார்.

குறள் 530:

உழைப்பிரிந்து காரணத்தின் வந்தானை வேந்தன்

இழைத்திருந் தெண்ணிக் கொளல்.

பிரிந்தவர்கள் மீண்டும் வரும்போதோ ஆய்ந்தே

விரும்பவேண்டும் நட்பைத்தான் இங்கு.

மதுரை பாபாராஜ்