அன்றும் இன்றும் விளையாட்டுகள்!

கிட்டி எறிப்பந்து பம்பரம் மற்றுமிங்கே
குண்டு ஒளிந்து விளையாடுதல் அங்ஙகங்கே
மற்றும் குதிரைதாண்டும் ஆட்டமும் சாலையில்
அன்று சிறுவர் விளையாடும் கோலமுண்டு!
இன்றெங்கே ஆடுகின்றார் இங்கு?

பெண்குழந்தை  சேர்ந்து கிளித்தட்டு சில்லாக்கு
பல்லாங் குழியாட்டம் கண்கட்டி ஆடுதல்
சொட்டாங்காய் மற்றும் கயிறுதாண்டும் ஆட்டமென்றும்
அப்போ குலைகுலையா முந்திரிக்கா ஆட்டமென்றும்
மாலைநேர மானால் தெருவில் களைகட்டும்!
ஆளையே காணோமே இன்று!

கணினி கைபேசிக்குள் எல்லோரும் வீட்டில்
தனித்தனியாய் அங்கங்கே உட்கார்ந்தே ஆடும்
மணிக்கணக்கு ஆட்டங்கள் இந்தப் பொறிகள்
தனக்குள் வைத்திருக்க பிள்ளைகள் எல்லாம்
இதற்கே அடிமையாய் மாறிவிட்ட  கோலம்!
நடப்பது  நன்மைக்கா கூறு?

பொறிக்குள் எலிகளாய் மாட்டித் தவித்தே
எதிலும் கவனமின்றி உண்பதைக் கூட
பதட்டமுடன் உண்ணுகின்ற காட்சிகளில் வாழும்
இளவட்டம் போவதெங்கே சொல்.

மதுரை பாபாராஜ்