ஆசிரியர் நாள் வாழ்த்து

 ஆசிரியர் நாள் வாழ்த்து!

மேனாள் குடியரசுத்தலைவர் மாண்புமிகு

ராதாகிருஷ்ணன் அவர்களுக்குப் பிறந்தநாள் வாழ்த்து!

05.09.20

ஆசிரியர், இந்திய நாட்டின் குடியரசின்

மாசற்ற பண்புத் தலைவரானார் சாதித்தார்!

ஈடற்ற அன்னார் பிறந்தநாளை ஆசிரியர்

நாளாகக் கொண்டாடும் நன்னாளே இந்நாளாம்!

வாழ்த்தி வணங்குவோம் நாம்.

ஆசிரியர் ஆசிரியைகளை வணங்குவோம்!

விண்ணில் நிலவின் பரப்பிலே காலடியை

என்ன நடக்குமென்றே ஆம்ஸ்ட்ராங் தெரியாமல்

அங்கே வைத்தது போல குழந்தைகள்

ஒன்றும் தெரியாமல் வந்தமர்ந்தே ஆசானை

அஞ்சியஞ்சிப் பார்ப்பார்! படிப்படியாய் ஆசானும்

பன்முக ஆற்றலைக் காட்டித்தான் கற்பிப்பார்!

பண்பால் மிளிரவைப்பார் பார்.

பல்கலை வித்தகராய் மாணவ மாணவிகள்

நல்லவராய் வல்லவராய் நாடுபோற்ற மாறிடுவார்!

சொல்லி விளங்கவைத்த ஆசான்கள் வாழ்த்துவார்!

எல்லோரும் வாழ்வில் பறக்கும் பறவைகளாய்

சென்றிடுவார் ஆசானை விட்டு.

தன்னால் உயர்ந்தோரை எண்ணி வியந்திருப்பார்!

நன்றிப் பெருக்குடன் மாணவ மாணவிகள்

எங்கிருந்த போதிலும் என்றும் நினைத்திருப்பார்!

தன்னலமற்ற ஆசானை வாழ்த்தி வணங்குவோம்!

பொன்னாளில் எல்லோரும் சேர்ந்து.

என்றும் நன்றியுடன்

மதுரை பாபாராஜ்

வசந்தா