82 தீ நட்பு

 குறள்களுக்குக் குறள்வடிவில் கருத்து

82 தீ நட்பு

குறள் 811:

பருகுவார் போலினும் பண்பிலார் கேண்மை

பெருகலிற் குன்றல் இனிது.

பரபரப் பான உறவெல்லாம் பொய்யே!

வளர்வதினும் தேய்தலே நன்று.

குறள் 812:

உறினட் டறினொரூஉம் ஒப்பிலார் கேண்மை

பெறினும் இழப்பினும் என்.

தேவையா? ஒட்டுவார்! இல்லையா? வெட்டுவார்!

தேவையில்லை இத்தகைய நட்பு.

குறள் 813:

உறுவது சீர்தூக்கும் நட்பும் பெறுவது

கொள்வாரும் கள்வரும் நேர்.

கள்வர், விலைமாது, பயன்பார்க்கும் தன்னல

நண்பர்கள் மூவரும் ஒன்று.

குறள் 814:

அமரகத் தாற்றறுக்கும் கல்லாமா அன்னார்

தமரின் தனிமை தலை.

போரில் கவிழ்க்கும் குதிரையன்ன நண்பரோ

தீது! தனிமையே நன்று.

குறள் 815:

செய்தேமஞ் சாராச் சிறியவர் புன்கேண்மை

எய்தலின் எய்தாமை நன்று.

நல்லது செய்தாலும் பாதுகாக்கும் உள்ளமற்ற

நட்பை விலக்குதல்  நன்று.

குறள் 816:

பேதை பெருங்கெழீஇ நட்பின் அறிவுடையார்

ஏதின்மை கோடி உறும்.

பேதையின் நட்பைக் காட்டிலும் பண்பான

சான்றோர் பகைமனம்  மேல்.

குறள் 817:

நகைவகைய ராகிய நட்பின் பகைவரால்

பத்தடுத்த கோடி உறும்.

சிரித்துக் கெடுக்கின்ற நட்பிங்கே இன்பம் 

அளிப்பதைக் காட்டிலும் வன்பகையின் கோடிகோடித் துன்பமே எவ்வளவோ மேல்.

குறள் 818:

ஒல்லும் கருமம் உடற்று பவர்கேண்மை

சொல்லாடார் சோர விடல்.

நம்மால் முடிவதைக் கூட முடியாமல்

செய்துவிடும் நட்பைத் தவிர்.

குறள் 819:

கனவினும் இன்னாது மன்னோ வினைவேறு

சொல்வேறு பட்டார் தொடர்பு.

சொல்லும் செயலும் முரண்படும் நண்பரால்

தொல்லை கனவிலும் தான்.

குறள் 820:

எனைத்துங் குறுகுதல் ஓம்பல் மனைக்கெழீஇ

மன்றிற் பழிப்பார் தொடர்பு.

வீட்டில் புகழ்ந்துரைத்து நாட்டில் பலர்முன்னே

தூற்றுவோர் நட்பை விலக்கு.