சாதித்துக் காட்டு
----------------------
வசதியாய் வாழ்ந்து வசதி குறைந்தால்
கடந்ததை எண்ணிக் கவலைப் படாமல்
நடக்கின்ற சோதனையைச் சாதனையாய் மாற்று!
தடங்கலைத் தாண்டு நிமிர்ந்து.
உறியடித்தல்
----------------
நெறிக்கம்பம் மீது நடுநிலைப் பானை
அறியாமைத் தோளில் அகங்காரம் ஏறி
உறியடிக்கத் தாவி உடைக்கத்தான்  பார்க்க
வெறியாட்டக் கோலத்தைத் தூற்று.
நடைமுறை உண்மை
------------------------
அண்ணனும் தங்கையும் பாச மலர்களாய்
அன்பில் திளைத்தனர் இல்லறம் காணுமட்டும்!
தங்களுக் கென்று துணையும் குழந்தையும்
வந்தபின்பு வேறுபட்டார் ஏன்?
காலத்தின் கட்டளை!
-----------+----------
இத்தனைநாள் யாரிங்கே எங்கெங்கே வாழ்வதென்ற
கட்டளையைக் காலம் விடுக்கிறது மானிடனே!
அத்தகைய கட்டளையை மாற்ற முயலலாம்!
வெற்றிதோல்வி ஏற்கப் பழகு.
வாழ்வின் இயல்பு
--------------------
தென்றல் வருடினால் இன்பமாய்த் தோன்றும்!
வன்புயல் தாக்கினால் துன்பங்கள் ஊன்றும்!
தென்றலும் வன்புயலும் மாறிமாறித் தோன்றுவதே
மண்ணக வாழ்க்கை அறி.