பொறுமையின் மறுபெயர் மக்கள்!

கேபிள் பதிக்க
சாலைகளைத் தோண்டுவார்!
சரியாக மூட மாட்டார்!
மேடு பள்ளங்கள் வரவேற்கும்!
வண்டிகள் உருண்டு விழும்!
மக்கள் பொறுத்துக் கொள்வார்!

அங்கங்கே மின்சார வயர்கள்
தொங்கும்!கீழே தண்ணீரில் மிதக்கும்!
மின்சாரம் பாய்ந்து
விபத்துகள் நேரும்!
மக்கள் பொறுத்துக் கொள்வார்!

அரசுப் பேருந்தில்
மூச்சு முட்ட பயணம் செய்வார்!
நிறுத்தத்தில் உதிர்ந்து விழுவார்!
மக்கள் பொறுத்துக் கொள்வார்!

ஷேர் ஆட்டோவில்
உட்கார இடமின்றி
விளிம்பில் பயணந்தான்!
விழுந்தால் மரணந்தான்!
மக்கள் பொறுத்துக் கொள்வார்!

மின்தொடர் வண்டியில்
தொங்கித் தொங்கிப்
பயணம் செய்வார்!
நிலையம் வந்ததும்
கலைந்து சரிவார்!
மக்கள் பொறுத்துக் கொள்வார்!

பண்டிகை நாளில்
பொருட்களின் விலைகள்
விண்ணை முட்டும்!
மக்கள் பொறுத்துக் கொள்வார்!

கலப்படம் ஊழல்
தலைவிரித் தாடும் !
கொண்டாட்டம் போடும்!
மக்கள் பொறுத்துக் கொள்வார்!

வாக்கு பெறும்வரை
வாக்காளர் எஜமானர்கள்!
வெற்றி பெற்ற பிறகு
வாக்காளர் எடுபிடிகள்!
மக்கள் பொறுத்துக் கொள்வார்!

அன்றாடம் இப்படி எத்தனையோ உண்டு!
அரசும் கண்டுகொள்ளாது!
அதிகாரிகளும் கண்டுகொள்ளமாட்டார்!
மக்களும் பொறுத்துக் கொள்வார்!

இதுதான் நடைமுறை உண்மை!
கின்னர் சாதனையை விஞ்சும் பொறுமை!