வேண்டும் நிரந்தரத் தீர்வு

இந்தியத் தாயே! இலங்கைத் தமிழர்கள்
செந்நீரும் கண்ணீரும் சிந்துகின்றார் -- உந்தன்
அரவணைப்பை நாடுகின்றார்! ஆதரவைத் தேடி
வருகின்றார் நித்தமும்! பார்.

அப்பாவி மக்கள் அருமைத் தமிழினத்தை
எப்பொழுதும் கொன்று குவிக்கின்றார்!--எப்பொழுது
இந்தக் கொடுமை முடியுமோ அம்மம்மா!
நொந்து துடிக்கின்றோம் நாம்.

இந்திய மீனவர்கள் தாக்கப் படுகின்றார் !
இன்றுவரை அக்கொடுமை தீரவில்லை!--கண்முன்னே
நித்தம் கொடுமைகள் கொக்கரித்தும் தீர்ப்பதற்கு
தத்தித் தயங்குவதும் ஏன்?

இலங்கைத் தமிழர்கள் சிக்கலுக்குத் தேவை
நிரந்தரத் தீர்வுதான்! நாடே!--உலகத்
தமிழினமே! ஒன்றுபடு! அந்தோ! இலங்கைத்
தமிழர்கள் வாடுகின்றார்!பார்.