126 நிறையழிதல்

 குறள்களுக்குக் குறள்வடிவில் கருத்து

126 நிறையழிதல்

குறள் 1251:

காமக் கணிச்சி உடைக்கும் நிறையென்னும்

நாணுத்தாழ் வீழ்த்த கதவு.

நாணமெனும் தாழ்ப்பாளால் மூடிய

பேரடக்கம்

பேணும் கதவையோ காதலன்புக் கோடரி

தூர்த்தே உடைக்கிற தே.

குறள் 1252:

காமம் எனவொன்றோ கண்ணின்றென் நெஞ்சத்தை

யாமத்தும் ஆளும் தொழில்.

காதல் இரக்கமின்றி என்னை நடுநிசியில்

ஆள்கிறதே தூக்கம் கலைத்து.

குறள் 1253:

மறைப்பேன்மன் காமத்தை யானோ குறிப்பின்றித்

தும்மல்போல் தோன்றி விடும்.

மறைக்கின்றேன் காதலை! தும்மல்போல் 

தோன்றி

வெளிவந்து காட்டிவிடும் சாற்று.

குறள் 1254:

நிறையுடையேன் என்பேன்மன் யானோவென் காமம்

மறையிறந்து மன்று படும்.

மனஅடக்கம் நம்பி  மறைத்திருந்தேன்!

காதல் 

கடந்துவந்து காட்டியதே ஊர்க்கு.

குறள் 1255:

செற்றார்பின் செல்லாப் பெருந்தகைமை காமநோய்

உற்றார் அறிவதொன் றன்று.

நம்மை வெறுத்தவர்பின் செல்லாது நிற்பது

நம்காதல் நோய்க்கில்லை சாற்று.

குறள் 1256:

செற்றவர் பின்சேறல் வேண்டி அளித்தரோ

எற்றென்னை உற்ற துயர்.

பிரிந்தவர்பின் செல்வதற்குத் தூண்டுகின்ற காதல்

துடிக்கவைக்கும் துன்பம் கொடிது.

குறள் 1257:

நாணென ஒன்றோ அறியலம் காமத்தால்

பேணியார் பெட்ப செயின்.

காதலர் நாம்விரும்பும் ஒன்றினைச்

செய்தாலோ

நாணத்தை நாமறியோம் சாற்று.

குறள் 1258:

பன்மாயக் கள்வன் பணிமொழி அன்றோநம்

பெண்மை உடைக்கும் படை.

மனஅடக்கக் கோட்டையைத் தாக்கும் கருவி

மனக்கள்வன் சொல்கின்ற பாகுமொழிச் சொல்தான்!

அனலை அணைக்கும் புனல்.

குறள் 1259:

புலப்பல் எனச்சென்றேன் புல்லினேன் நெஞ்சம்

கலத்தல் உறுவது கண்டு.

ஊடுவேன் என்றேதான் சென்றேன்! மனவேகம்

கூடலைத் தூண்டிவிட கூடினேன் அன்பருடன்!

ஊடலிலே தோற்றுவிட்டேன் வென்று.

குறள் 1260:

நிணந்தீயில் இட்டன்ன நெஞ்சினார்க் குண்டோ

புணர்ந்தூடி நிற்பேம் எனல்.

தீயில் கொழுப்பாய் உருகிவிடும் நெஞ்சுடையோர்

காதலர் கூடலில் ஊடலை ஏற்பாரோ?

சோதனயை ஏற்கமாட்டார் கூறு.