128 குறிப்பறிவுறுத்தல்

 குறள்களுக்குக் குறள்வடிவில் கருத்து!

128 குறிப்பறிவுறுத்தல்

(ஒருவர்க்கொருவர் குறிப்பு அறிவுறுத்தல்)

குறள் 1271:

கரப்பினுங் கையிகந் தொல்லாநின் உண்கண்

உரைக்கல் உறுவதொன் றுண்டு.

சொல்ல மறைத்தாலும் உன்மைவிழி

சொல்கின்ற

செய்திக் குறிப்பொன்றிங் குண்டு.

குறள் 1272:

கண்ணிறைந்த காரிகைக் காம்பேர்தோட் பேதைக்குப்

பெண்நிறைந்த நீர்மை பெரிது.

கண்ணழகும் மூங்கிலன்ன தோள்களும் 

கொண்டவளின்

பெண்மை அழகே உயர்வு.

குறள் 1273:

மணியில் திகழ்தரு நூல்போல் மடந்தை

அணியில் திகழ்வதொன் றுண்டு.

மணிகளுக் குள்ளிருக்கும் நூல்போல மாதின்

மணியழகில்  உண்டு குறிப்பு.

குறள் 1274:

முகைமொக்குள் உள்ளது நாற்றம்போல் பேதை

நகைமொக்குள் உள்ளதொன் றுண்டு.

அரும்புக்குள் உள்ள மணம்போல மாதின்

சிரிப்பில் குறிப்பொன் றுண்டு.

குறள் 1275:

செறிதொடி செய்திறந்த கள்ளம் உறுதுயர்

தீர்க்கும் மருந்தொன் றுடைத்து.

அன்பரசி கள்ளக் குறிப்பில் மருந்துண்டு

என்காதல் நோய்தீரத் தான்.

குறள் 1276:

பெரிதாற்றிப் பெட்பக் கலத்தல் அரிதாற்றி

அன்பின்மை சூழ்வ துடைத்து.

அன்பர் தழுவுகின்ற அன்பில் பிரிகின்ற 

எண்ணக் குறிப்பொன் றுண்டு.

குறள் 1277:

தண்ணந் துறைவன் தணந்தமை நம்மினும்

முன்னம் உணர்ந்த வளை.

குளிர்ந்த துறையன்பர் நம்மைப் பிரிவார்,

அளிப்பார் துயரென் றுணர்ந்து வளையல்

கழன்றதோ வீழ்ந்திங்கு சாற்று.

குறள் 1278:

நெருநற்றுச் சென்றாரெங் காதலர் யாமும்

எழுநாளேம் மேனி பசந்து.

நேற்றுதான் அன்பர் பிரிந்துசென்றார்! பலநாள்கள்

ஆனதுபோல் இந்தப் பசலை படர்ந்ததே!

ஏனோ கொடுமை எனக்கு?

குறள் 1279:

தொடிநோக்கி மென்தோளும் நோக்கி அடிநோக்கி

அஃதாண் டவள்செய் தது.

அன்பர் பிரிந்தால் வளைநழுவும்  கைபார்த்தாள்!

மங்கி மெலியுமென்று தோள்பார்த்தாள்!  மீறினால் 

பின்தொடரும் கால்பார்த்தாள் நின்று.

குறள் 1280:

பெண்ணினாற் பெண்மை உடைத்தென்ப கண்ணினால்

காமநோய் சொல்லி இரவு.

கண்களால் தூதுவிட்டுக் காதலன் போகவேண்டாம்

என்றுரைத்தல் பெண்மைக்கு பெண்மையைச் சேர்க்கின்ற

தண்ணழகுச் சித்திரந் தான்.

மதுரை பாபாராஜ்